Lordreseko kaleetan zabaltzen ari ziren susmohoriekin guztiekin eta kontuan izanda jendearen beldurra eta urduritasuna jada jasanezina ari zela bilakatzen, poliziaburuak egun haietan erabaki zuen heldua zela Jack Destripatzailea izan zitekeenaren izena jakitera emateko. Hala ere hiriko egunkari garrantzitsuenetara pasatutako filtrazio bati esker jakin zuen jende arruntak, jakin genuen denok, nor zen susmagarri garantzizko hura, ordura arteko lehena. Egia zen poliziak jende asko atxilotu egin zuela, baina esan bezala egun batzuk galdeketak egiten eman ondoren, askatu egin zituen. Orain, ordea, bazirudien susmagarri hau benetako susmagarria zela, pertsona garrantzizko bat. Bere izena hauxe: Robert D´Onston doktorea.

Jendeak jakin zuenean lehen susmagarri hori medikua zela asko eta asko lasaitu egin ziren; izan ere, beren susmoekin bat zetorren figura hura. Egia baita mediku batek anatomiako ezaupide handiak dauzkala, hain zuzen ere horixe delako bere ofizioa, eta oso ondo dakiela aiztoak eta ebakuntzetarako zernahi tresneria erabiltzen.

(…)

Bai, magia beltza praktikatzen omen zuen, ziotenez, eta horrek halako itzal beldurgarria eman zion bere pertsonari. Jendeak bazekien, Londrersera bizitzera etorri zenean, magia beltzarekin lotutako erritualak praktikatzen zituela, eta, ez hori bakarrik, baita ere bere inguruan jarraitzaile ugari zituela. Erritual horiek egiten zituenean saiatzen zen isilpean dena mantentzen baina ezinezkoa zitzaion, batik bat batzuetan erritual horietan gurutzea profanatzen zuenean.